« 24 Apre sa, Jezi di disip li yo: Si yon moun vle mache dèyè m’, se pou li bliye tèt li. Se pou l’ chaje kwa l’ sou zepòl li, epi swiv mwen. 25 Paske, moun ki ta vle sove lavi l’ va pèdi li. Men, moun ki va pèdi lavi l’ poutèt mwen, li va jwenn li ankò. 26 Kisa sa ta sèvi yon moun pou l’ ta genyen lemonn antye si l’ pèdi lavi li? Kisa yon moun kapab bay pou l’ gen lavi? » (Matye 16:24-26)

« 7 Men, nou tout k’ap pote richès Bondye sa a nan kè nou, nou tankou veso ki fèt an tè. Tou sa se pou tout moun ka wè kokenn chenn pouvwa sa a pa soti nan nou, men se nan Bondye li soti. 8 Mwen jwenn tout kalite fikilte; men, mwen pa janm kwense nèt. Mwen konn rive nan sitiyasyon mwen pa konn ni sa pou m’ fè, ni sa pou m’ di. Men, mwen pa janm pèdi espwa. 9 Yo pèsekite m’, men Bondye pa janm lage mwen. Mwen pran gwo so, men mwen pa rete atè a. » (II Korentyen 4:7-9)